Carmen eta Silvia Mateo ahizpak eta artistak dira. Bata marrazkilaria eta bestea olerkigilea. Xabier Olano eskultorearekin batera erakusketa bat egitera animatu ziren. Honela, hiruon lana batu, eta hori izan da azken emaitza: Adierazteko moduak... irudiak eta mezuak. Hain justu, Carmenen akuarelek, Silviaren olerkiek eta Olanoren eskulturek osatzen dute erakusketa, eta abendu bukaera arte izango da ikusgai Orexako ganbaran.
Denera 44 pieza biltzen ditu erakusketak; 22 akuarela eta 22 eskultura. «Kasualitate galanta» dela dio olerkigileak, «ez baikenuen hori pentsatu». Eskulturen artean, eskultura figuratiboak edota instrumentuak aurkitzen dira. Horietako batzuk, beste artista batzuen erreplikak izan arren, gehienak Olanoren obrak direla dio Silviak, «eta horiek dira niretzako originalenak». Akuareletan, berriz, pertsonaia asko agertzen dira, baina, batez ere, naturarekin lotutako margoak ikus daitezke.
Lan bakoitzak mezu bat du, eta hori ulertzeko Silviak idatzitako olerkia du lagun. «Horietan naturaren edo gizakiaren jarrerarekin lortutako gauzen inguruan aritzen naiz, hau da, bizitza gauza eta une bakoitzaren aurrean nola jokatzen dugu». Hortaz, hausnarketarako tartea sortu nahi du erakusketak, eta horretarako, gonbita zabaldu du artistak.
Bideoa: Silvia Mateo.