Lehen instalazioa Orexako ostatuko teilatuan izan zen, bigarrena frontoian eta, oraingoan, Oihan Txiki kooperatiban egiten ari diren hirugarren instalazioarekin bukatzear daude. Orain arte, hiru urteko lana izan dela azaldu du Eneko Maioz alkateak, eta oraindik luzerako dute. "Azterketa bat ari gara egiten hurrengo urtera begira, eta eguzki plakak etxebizitzetan jartzeko asmoa dugu. Orain energia komunitatea ere sortzen ari gara, hori guztia kudeatzeko helburuarekin" azaldu du.
Hirugarren instalazioa guztiz amaituta, lehen hiru faseekin Orexak behar duen energiaren erdia sortuko dela kalkulatu du gainera. Horregatik, azken fasea edo bukatzear dagoena etxebizitzena izango dela esan du alkateak: "Orexa bizirik mantentzeko genuen estrategia, energia mantentzea zen; energia arloan gure herriak burujabe izateko gaitasuna duelako".
Herritarrak, gainera, hasieratik proiektuaren parte izan direla azpimarratu du: "Herrian oso parte hartzaileak izan gara beti eta nahiko eredu naturala dela uste dut".