Jatorrian listeria monocytogenes bakteria zuen meningitis kasu bat atzeman dute Madrilen —gaixoa sendatzen ari da—, eta Orexako Oihan Txiki kooperatibak ardi gazta gordinarekin egiten dituen pasta biguneko gaztak sorta guztiak merkatutik kentzea erabaki du Jaurlaritzak. Gutizia, Txuria eta Beltza izeneko gaztak kendu dituzte merkatutik, Osasun Sailaren arabera. Eusko Jaurlaritzak, era berean, etxean gazta hori dutenei botatzeko eskatu die; eta jan badute, medikuarengana joateko, zerbait ezohikoa sentitzekotan.
Espainiako Kontsumorako, Elikadura Segurtasunerako eta Nutriziorako Agentziak berri eman du Euskal Herrian ekoitzitako ardi esne gordindun gazta baten ondorioz meningitis kasu bat atzeman dutela. Gazta Oihan Txiki kooperatibak ekoitzitakoa dela ondorioztatu ondoren erabaki du Jaurlaritzak hura merkatutik kentzea. Gazta horiek Euskal Herrian ez ezik Katalunian eta Madrilen ere saltzen dira.