Azken konponketa teknikoek emaitza onak eman dituzte eta egun, ia eskualde osoan ondo entzun daiteke ATARIA irratia 107,6 fm-ean eta www.ataria.info webgunean. Hori ezagutarazteko eta herritarrek irratian zuzenean parte har dezaten ahalbidetzeko, ATARIA irratia herrietatik bertatik ari da emititzen ostiraletan. Horrenbestez, gaur Orexan izango da ATARIA irratia; uztailaren 11n Elduainen; eta uztailaren 18an, Gaztelun. Hori izango da udako oporren aurreko azken saioa.
'Ataria', elkarlanaren fruitu
TOLOSALDEKO ATARIA errealitate dugu joan den urritik. Txolarre Irratiak, Tolosaldeko Hitzak eta Galtzaundi euskara taldeak indarrak batuta sortu den proiektua da. Urte askotako lanaren emaitza izan da ATARIA. Komunikabide talde bakoitzak bere eremua definitu eta irabazia zuen. Asko zen eskualdean euskarazko hedabideek lortu zutena, baina, ere berean, argi zegoen bakoitza berean egonda, aurrera begira baino gehiago, bereari eusten zegoela. Etorkizunean erreferentzialak izateko urrats sendoak eman behar ziren aurrera, arriskatu egin behar zen, indarrak batu eta elkarlanean aritu.
Ezaguna da, bereziki azken hamarkadan, eta mundu osoan, komunikazioaren sektoreak bizi izan duen etengabeko eraldaketa. Izan ere, Interneten eta teknologia berrien erabilera orokortu izana eragin zuzena izaten ari da hedabideen ohiko negozio ereduan, eta horrek krisi sakona ekarri du tokiko komunikabideen esparrura. Baina, krisiak krisi, Tolosaldeak behar du euskal hedabideen sare indartsua, erreferentziala. Euskararen normalizazioak behar-beharrezkoa du. Eta hori lortzeko ahaleginean abiatu da TOLOSALDEKO ATARIA.