IX. Eltxotraileko irabazleak: Irati Larrañaga eta Amets Aranberri

Amets Aranberri zestoarrak irabazi du 21 kilometroko lasterketa 1.29.56 denbora eginda. «Indarrean nentorren, baina izterrean molestia batzuekin eta beldur nintzen. Eutsi egin diot eta irabaztea lortu dut», esan du korrikalariak. Lasterketa luzean, laugarren egin du Iker Ormaetxea herriko korrikalariak. Aurretik antolakuntzan aritutakoa da, baina behin ere ez da atera Eltxotrailen. «Lehen aldia izan dut eta oso pozik nago. Ordubete eta 40 minutuko denbora jaisteko helburuarekin atera naiz eta lortu dut». Herenegun karrera markatzen aritu zen Ormaetxea eta ingurunea ezagutzea abantaila izan litekeela aitortu du. Bizkaia aldean egin izan ditu lasterketak, baina urtebete baino ez darama korrika.

7,3 kilometroko ibilbidea egin duten korrikalarien artean izan dira gora-behera batzuk. Lasterketa buruan zihoazen zenbait korrikalarik ibilbidea nahastu dute eta beranduago iritsi dira helmugara. Tartean zen iazko irabazlea Adrian Pajares, aurten 13. tokian sailkatu dena. Gizonezkoen podiuma eskualdeko mutilek osatu dute, Mattin Intxaurrondo berastegiarrak irabazi du eta haren anaia geratu da hirugarren; bigarren tokian sailkatu da Bedaioko Anartz Azpiroz.

Azken orduan eman du izena emakumezkoen lasterketa motza irabazi duen Nerea Garcia donostiarrak. «Egun-pasarako plana egin dut familiarekin, hemen inguruan bazkaldu dugu gero lasterketan parte hartzeko asmoarekin. Ez nituen paraje hauek ezagutzen eta asko gustatu zaizkit. Espero gabe iritsi naiz lehen tokira eta oso pozik nago». Garciaren atzetik sailkatu da Libe Lafuente, iaz ere bigarren egin zuen emakumezkoa eta hirugarren tokian, berriz, Uxue Zuriarrain amezketarra.