Nekane Lopetegik urteak eman ditu udal idazkari lanetan eta orendaindarrek urteotan egin duen lana eskertu nahi izan diote. Txupinazoa botatzeko eginkizuna izan du laster erretiroa hartuko duen langileak.
Udal zinegotziek aitortu dute gertu sentitu izan dutela beti Lopetegi. "Herri txikietako beharrak eta indarguneak ikusteko abilezia izugarria duzu, baita ideia berriak ekartzeko ere. Uste dugu idazkaria baino askoz gehiago zarela. Eskerrik asko bihotz-bihotzez egin duzun lan guztiagatik". Herriaren izenean opariak ere eman dizkiote idazkariari eta bertso bat ere kantatu diote.
Lopetegik eskertuta jaso du aitortza. "Elkarrekin lan egitera behartuta gaude herri txikiek biziraun dezaten. Herri txikiak dira gure altxor guztien gordelekua. Zaindu beraz gure altxor guztiak, euskaratik hasita, ingurunea eta paisaiatik jarraituta". 36 urtetan aritu da lanean Lopetegi Orendainen, Baliarrainen eta Abaltzisketan eta gustura aritu dela esan du.
Suziria bota ondoren herri kirol saioa izan da eta horrekin eman zaio hasiera jai egitarau ofizialari. Larunbatera arte segiko du festak Orendainen.
Egitaraua
- 19:00. Ilargi txaranga.
- 21:00. Saiheski jatea.
- 23:00. Muxutruk taldearen erromeria.