Herri bazkaria izan dute aurrena, eta orduan Euskaraldia Hika ekimenean parte hartzeko aukera izan dute herritarrek. Arratsaldean, eguraldi ederra baliatuta, udaletxe aurreko belardia hitz egiteko, festarako, poteorako eta umeen jolaserako gune bihurtu da. Umeak adinka banatuta, helduek proposatutako jolasetan ibili dira. Esaterako, hanketan loturik zeramaten globoak elkarri lehertzen aritu dira.
Gazteek txosna jarrita zuten, eta Orendainera pitxien postuak ere iritsi dira, barrakazaleen eskutik.
Festak iluntzera arte ez du atsedenik hartuko. Izan ere, Burrunbazale txaranga herrian barrena ibiltzeaz gainera, euskal garagardoa eta hanburgesak izango dituzte afaltzeko, eta azkenik, Kilimak eta DJ Txekor-en musika.