Herri batzarra egingo dute Orendainen, igandean

Aurretik ere herritarrek auzolanean garbitu dute Orendaindik Alegiara bitarteko errepidea.

Aurtengo udal aurrekontuari buruzko informazioa emango da, eta datorren urteari begirakoa aurkeztuko da.

Herri batzarra egingo dute, igande honetan, Orendainen. 12:00etan elkartuko dira udaletxeko osoko bilkura aretoan, eta udaletik eskatu dute gutxienez etxe bakoitzetik ordezkari bat joateko bertara. Udal aurrekontua izango dute hizpide, besteak beste, batzarrean. Zehazki, aurtengoari buruz informatuko dute, eta urtearen bukaeraren aurreikuspena zein den azalduko dute. Horrez gain, datorren urteko udal aurrekontuaren aurkezpena egingo dute.

Laida Plazaola parte hartze teknikariak herrian egiten diren ikastaroen berri emateaz gain, Euskaraldia eta Indarkeria Matxistaren Aurkako Egunaren inguruan sortu diren lan taldeen berri emango du. Bere aldetik, Gorka Egia alkateak aurten egin diren inbertsioen berri emango du, eta auzolan proposamena egingo du, Orendaindik Alegiara bitarteko bidea garbitzea, hain zuzen.

Batzarraren aurretik, 11:30ean, herri bideen inguruko lan talde bat osatzeko bilera irekia egingo dute udaletxean. Bileran herri bideak identifikatu eta konponketa egiteko egutegi bat finkatu nahi dute.

Albiste hau ATARIKIDEei esker argitaratu dezakegu. Haiei esker Tolosaldeko albisteak libre, euskaraz eta kalitatez irakurtzen dituzu. Horrela izaten jarraitzeko eman babesa Tolosaldeko Atariari eta ZU ERE IZAN ZAITEZ ATARIKIDE.

BATAK BESTEA DAKAR


EGIN ATARIKIDE!