Haur, gazte eta helduek parte hartu dute txirrindulari proban, adin tarte bakoitzari egokitutako distantzian. 16 urtetik gorakoek Alegiatik Orendainerako bidea egin dute, eta gizonezkoetan parte hartu duten hamar txirrindularietatik azkarrena Iban Eskisabel tolosarra izan da. Emakumezkoetan parte hartzaile bakarra izan da, Naiane Arrospide ibartarra, eta berak eraman du txapela etxera.
Lehia estua izan dute Eskisabelek eta Plazaolak. Orendaindarrak egin du aurrera igoeraren hasiera partean, eta tolosarrak jarraitu dio atzetik. Plazaola saiatu da erasoen bitartez Eskisabel atzean uzten, baina ez du lortu. Eskisabelek Orendaingo bidegurutze parean jo du bere erasoa eta aurretik iritsi da helmugara, proba horretan bere bigarren txapela lortuz.
Haur eta gazteen artean beste hiru maila egin dira, eta lehen neskak eta lehen mutilak garaikurrak lortu dituzte. Parte hartzaile guztiek domina eskuratu dute.
Zenbat babarrun ale ote daude kilo batean?
Ekitaldi berri bat antolatu dute aurtengo Orendaingo festetan. Kilo batean zenbat babarrun ale zeuden asmatu behar zen, beti ere, kopurutik pasa gabe. Euro bat jarri behar zen eta guztira 245 parte hartze izan dira. Altzon bizi den Antton Iztueta abaltzisketarra izan da gehien gerturatu dena. Guztira 1.569 babarrun ale zeuden, eta Iztuetak 1.560 egongo zirela bota du. Sari moduan, babarrun kiloaz gain, Larreta esnekietako eta Argaia-Goenako produktuak jaso ditu.