Meza nagusitik atera, eta udaletxe parera gerturatu dira herritar asko. Bertan zain zeuden herriko haur eta gaztetxoak, oinak dantzan jartzeko. Agurra, zazpi jauzi, fandangoa, arin-arina... era guztietako dantzak egin dituzte, guraso eta herritarren gozamenerako. Ondoren, herriko trikitilarien txanda heldu da, beraiena izan baita, sagardo dastaketa hasi baino lehen, herria girotzeko ardura.
Gaurko festa egun handiak, arratsaldean izango du jarraipena, haur jolasekin eta ipuin kontaketarekin. Gainera, beste urte batez, lokotx biltze txapelketaren laugarren edizioa ospatuko da, zahagi ardoaren aurretik. Aurtengo jaietako nobedade nagusia, berriz, gaueko pilota partida izango da. Hala ere, bertan, botilero lanak egingo dituztenak, bi bertsolari izango dira. Jarraian, egunari amaiera emateko, erromeriaz gozatu ahal izango da plazan. Bihar gauean emango diete amaiera festei, harriari buelta emanda, baina aurretik, egitarau oparoa prestatu dute egun guztirako.
