Hirugarren urtez antolatu dute Orendaingo Sorginek Zarena Zarelako festa. Iaz jaio ziren bost haurrei ongietorria egin zieten: "2017 oso urte berezia izan da. Gure herriko habia bost txorirekin bete zaigu, Itoitz, Eiden, Milan, Ilargi eta Aiert. Ongi etorri guztioi eta zorionak gurasoei, familiei, zuen poza herriaren poza ere bada eta".
Orendaingo Sorginek ere aitortza egin zieten herriko bi emakumeri: Txaro Arrona eta Getru Aldalur. Sorginek azaldu zutenez, "feminismotik ari gara herrigintzan, emakumeok merezi dugun eta zor zaigun tokia izateko. Eta urrutira joan gabe, aurten Zarena Zarelako aitortza gure bide honetan lagin ditugun bi emakumeri egin nahi diegu".
Besteak beste, Arronari "konpromisoari beldurrik gabe, gizarte jasangarri, justu eta parekide baten alde beti bustitzeko prest izateagatik, eta euskararen herriari diozun maitasunarekin besteok ere bustitzen gaituzulako" egin diote aitortza. Aldalurri, besteak beste, "harremanak eta konplizitateak josteko orratza eta haria beti prest izateagatik, zure baikortasunak motibatzen gaituelako, amesten dugun hori lortzea Gure Esku dagoela erakusteagatik" egin diote aitortza.
Eguna borobiltzeko Eltxo elkartean talo jatea egin zuten, elkarteak berak eta udalak antolatuta, eta 70 pertsona inguru bildu ziren bertan. Bukaeran herriko produktuekin osatuta saski bat eman zitzaion Zelaietako gaztaren laurden baten pisua asmatzera gehien gerturatzen zenari. Saskian Sasiango baratzeko produktuak, Larreta esnekiak eta Zelaietako gazta zeuden, eta saskia Sasiango baratzeko Garbiñe Arregik egina izan zen.