Haurrak naturan hazi eta hezteko proiektua da Baso Eskolaren atzean dagoena eta Orendaingo hainbat gurasok abiarazi nahi dute. Hori dela eta proiektuan laguntzeko kide berrien bila dabiltza. «Guraso, hezitzaile... edo proiektuarekiko interesa duen edonoren bila gabiltza», esan dute. Interesa dutenei orendaingobasoeskola@gmail. com helbidera idazteko eskatu diete.
Baso Eskolaren funtsa haurren ikasgela natura izatea da, idazten, irakurtzen, matematikak lantzen edota talde kooperazioa landuko lukete, beti ere naturak ematen dituen baliabideak baliatuz.
Emmi Piklerren eta Reggio Emilia eskolen metodologian oinarrituko litzateke, hau da, haurren mugimendu askea sustatuz, besteak beste.
HAINBAT EKINTZA
Baso Eskola martxan jartzeko informazio bilerak eta jardunaldi batzuk egin dituzte azken hilabeteetan eta baita informazio mahai bat jarri ere, Tolosako Trianguloan.
Irekiko balitz Orendaingoa Euskal Herriko lehen Baso Eskola izango litzateke. Madrilen ireki zuten bat pasa den ikasturtean, eta Alemanian eta Eskandinavian oso ugariak dira.