Larunbatean, 50. Euskal Herriko dantza txapelketa ospatu zen Segurako Baratze pilotalekuan. Guztira, bederatzi dantza bikote aritu ziren arin-arin eta fandango lehian, eta tartean Onditz Esnaola lizartzarra izan zen. Gorka Granado sopelarrarekin batera parte hartu zuen, eta bigarren sailkatu ziren; lehenak Jone Arriaran eta German Aranburu azpeitiarrak izan ziren; eta hirugarrena, Lezoko Ane Jaunarena eta Endika Osa.
Ez zen lizartzarrak bere bikotearekin batera lortu zuten sari bakarra izan. Guillermo Areizaga saria –lehenengo aldiz parte hartu eta ongien sailkatu direnentzako saria– ere eraman zuten. Dantza jantzien saria, berriz, Azpeitiko Nora Aizpuru eta Iker Zabalak lortu zuten.