Lizartzako Otsabio kirol elkarteak jarduerak antolatu ditu aste honetara. Ostegunean izango dute lehen hitzordua; Josu Ozaita ibartarraren Hatsa dokumentala proiektatuko dute, 19:00etan, udaletxeko areto nagusian. Zinemaldiak eta Eusko Jaurlaritzak antolatutako Eusko Label Film Mikrolaburren Lehiaketako aurtengo irabazleetako bat izan da ibartarra. Hain justu, doktoretza tesiaren harira egindako hiru minutuko mikro-dokumentala da Hatsa, eta bertan txondorren prozesua jorratzen da. Dokumentalaren proiekzioaren ostean, lan horren nondik norakoak azalduko ditu Ozaitak berak.
Horrez gainera, igandean, mendi irteera egingo dute. Ohi moduan, bi ibilbide izango dira aukeran; 14 kilometroko ibilbide luzea –Lizartza, Pagoluze, Leozegaizto, Lapar eta Lizartza– edo 6 kilometroko ibilbide laburra –Lizartza, Pagoluze eta Ilarratsu–. Bi ibilbideetako parte hartzaileak 8:30etan abiatuko dira Lizartzako plazatik.