Seigarren irteera izango dute larunbatean Ezetz 4! erronkan parte hartzen ari diren lizartzarrek. Herriko plazatik 08:00etan abiatuko dira kotxeetan eta Zumaiara iristean, ohi bezala, bi ibilbide izango dituzte aukeran; ibilaldi motzak 10 kilometro izango ditu eta luzeak, berriz, 18 kilometro. Ibilbide luzea egiten dutenek Euskotrena hartu beharko dute Debara joateko, handik hasiko baitute ibilbidea eta Flyscharen bidea egingo dute. Bi ibilbideak amaituta, Zumaian elkartuko dira parte hartzaile guztiak eta mokadurako aukera izango dute.
«Mendiaz gain, kostako bidea ere egin nahi genuen eta Flyscha eta itsas labarrek itsas zabalarekin bat egiten duten guneak ere ezagutu», adierazi dute elkartetik. Halaber, herritarrak animatzeko deia egin dute, «eguraldi ona izango dugu eta jendea animatzea espero dugu, kosta ezagutzeko eta naturaren altxor paregabeaz gozatzeko».