Otsabio Kirol Elkarteak antolatutako Ezetz 4! erronkaren bosgarren irteera egin zuten atzo goizean Aizkorri-Aratzera. Herritar ugarik parte hartu zuten, eta irteera guztietan bezala, bi ibilbide izan zituzten aukeran; ibilbide laburrak 10 kilometro eta 450 metroko desnibela zuen eta ibilbide luzeak, berriz, 18 kilometro eta 1.100 metroko desnibela. Abiapuntua bi kasuetan Arantzazu izan zen, baina ibilbide laburrean Urbiara igoera izan zuten helburu, eta luzean Aizkorrira.
Elkarteko kideek kontatu bezala, eguraldi «bikaina» izan zuten eta «ikaragarri» disfrutatu zuten. «Mundiala izan zen giroa, tenperatura eta bistak, eta Urbian ederto bazkaldu genuen. Mendiak asko ematen du».
Datorren hitzordua apirilaren 21ean izango dute eta Zumaiako Flyshetara egingo dute irteera. Informazio gehiago aurrerago zabaltzen joango direla jakinarazi dute elkartetik.