Eguraldi eguzkitsua izan dute oraingoan Lizartzako mendizaleek. Hain zuzen, Otsabio Kirol Elkarteak antolatutako Ezetz 4! erronkaren hirugarren irteera egin zuten atzo goizean Aiako Harrietara. Herritar ugarik parte hartu zuten, eta irteera guztietan bezala, bi ibilbide izan zituzten aukeran; ibilbide motzak 6 kilometro eta 450 metroko desnibela izan du, eta luzeak, berriz, 12 kilometro eta 800 metroko desnibela. Elkarteko kideek adierazi bezala, «paraje zoragarriez eta adiskideez gozatu dugu, aterpetxean mokadu bat jan eta arratsaldean etxera egin genuen buelta».
Datorren hitzordua martxoaren 17an izango dute eta Aizkorri-Urbia egingo dute. Horrez gain, eskiatzera joateko irteera ere antolatu dute otsailaren 24 eta 25eko asteburuan. Izen ematea otsailaren hasieran irekiko da, eta informazio gehiago aurrerago zabaltzen joango direla jakinarazi dute elkartetik.