Tolosako inauteriak sona handia dute Euskal Herrian, baina eskualdean baditugu tradizio handiko eta izaera propioa duten beste inauteri batzuk ere. Horien artean, esaterako, Lizartzako inauteriak daude. Giro ederrean ospatzen dituzte urtero lizartzarrek, eta dagoeneko datorren urteko inauterietako antolaketari ekin diote. Izan ere, inauterietako dantzak prestatzeko entseguak antolatu ditu Otsolar dantza taldeak, eta lehen entsegua urriaren 20an, ostiralean egingo dute, 17:00etatik 18:00etara, Gunean. Saioak ostiralero ordu eta leku berean izango dituzte.
Entseguak doakoak izango dira eta 8 urtetik aurrerako herritarrek parte hartu dezakete bertan. Izena emateko interesa dutenek Josune Zubeldiarekin jarri beharko dute harremanetan.