Egiari Zor elkarteak esan zuen Sekretu Ofizialen Legeak sailkatutako dokumentazioa desklasifikatuko balitz, Naparraren gorpuzkiak berreskuratzea eta kasua argitzea posible izango litzatekeela. «Naparraren kasua estatu terrorismoaren inguruan oraindik dagoen zigorgabetasun iraunkorra agerian uzten duen beste kasu bat da; hala ere, bere gorpuzkiak aurkitzen ez diren bitartean indarrean dagoen delitua da», gaineratu zuen. Salatu zuen, era berean, familiak oraindik bere gorpuzkiak berreskuratu ez izana «indarrean dagoen kalitate demokratiko kaskarraren sintoma» dela, eta baita «kasu hau zein Frankismoan, trantsizioan eta ustezko demokrazia honetan zehar gertatutako beste batzuk argitzeko borondate ezaren froga ere».