Jendetza elkartu da Lizartzako Askatasunaren Plazan gaurko ekitaldian. Ina Zeberioren senideak ez ezik, hainbat herritar eta eskualdetik joandakoak ere bertan ziren. Maider Agirrebarrena herritarrak gidatu du ekitaldia, eta sarreran azaldu duenez, «Euskal Herriko gatazka politikoaren testuinguruan milaka giza eskubideren urraketak gertatu dira, ehunka heriotza. Horiei guztiei egia, aitortza, justizia eta erreparazioa zor diegu, diskriminaziorik gabe, salbuespenik gabe». Bertsoak entzuteko aukera izan da ondoren, eta baita abesti bat entzuteko ere.
Orain 25 urte gertatu zenaren berri eman dute jarraian, eta, besteak beste, gogora ekarri dute Ertzaintza bera izan zela «Inaren heriotza giza eskubideen kontrako balizko jardueraren ondorioz eman zen ala ez ikertu zuena». Ekitaldiaren jarraituz, Egiari Zor fundazioko Pilar Garaialde alegiarrak hitz egin du. Besteak beste, Garaialdek azaldu duenez, «guk ez dugu gatazkaren ondorio eta erantzukizun batzuei muzin egiten dien eta beste batzuk betikotzen dituen justizia eredu honetan sinesten; biktimen eskubideak errespetatuko dituen eta aldi berean, hainbat hamarkadatan indarkeriak eragindako ondorioak gaindituko dituen bizikidetza agertoki batera iristeko beharrari erantzungo dion justizia eredua behar dugu».
Aurreskuaren txanda iritsi da ondoren, eta bere saioa bukatu ostean, lore sorta eman diote dantzariek Ina Zeberioren amari. Jarraian lore sortak jarri dira Ina Zeberioren omenezko monolitoaren ondoan. Horrez gain, 25 lore jarri dituzte beste hainbat pertsonak, Ina Zeberioren hilketa izan zenetik pasa diren urteak irudikatuz.
