Hasieran publiko gutxi bazegoen ere, berehala bete dira Aztinondo frontoieko harmailak. Herriko pilota eskolako haurrek eman diote hasiera jaialdiari, eta giro ederrean jokatu dituzte partidak. Ondoren, emakumezkoen txanda izan da.
Lizartzarrek bazuten faboritoa, tartean Irati Zabala herritarra baitzegoen. Zabala lizartzarra Arrietarekin batera aritu da, Aldaregia-Mendibururen aurka. Lehen tantoak gorrienak izan badira ere, urdinak euren indarra atera dute eta azkar aurreratu zaizkie. Markagailua 17ra berdintzea lortu dute, baina lehia estu baten ondorioz, Aldaregiak eta Mendiburuk lortu dute garaipena, 19-22ko emaitzarekin.