Goizean abiatu da Otsolar dantza taldeak Lizartzako Udalaren babesarekin antolatzen duen Erromeri Eguna. Bederatzigarren aldia dute antolatzen dutena. Goizean kalejira egin dute herriko dantzariek eta 13:00 aldera plazan bildu dira jendaurrean emanaldia egiteko. Otsolar dantza taldekoekin batera Udaberri dantza taldekoak ere aritu dira. Zuberoako Maskaradako dantzak eta Arratiakoak dantzatu dituzte dantza ikuskizunaren hasieran eta bukaeran.
Otsolar dantza taldeko adin ezberdinetako dantzariek, besteak beste, agurra, sorgin dantza, banangoa, zaku zaharrak, Lantzekoa, fandangoa eta arin-arina dantzatu dituzte. Emanaldiaren ondoren, bazkaria egin dute.
18:00ak aldera trikiti doinuek alaituko dute plaza, Elustondo anai-arrebekin. Dantza zaleak direnak erromerian ibiltzeko aukera izango dute, eta jan-edana gehiago gustatzen zaionarentzat ere izango da aukera: 19:00etan sagardo eta pintxo dastaketa izango da.
