Urte batzuk pasa dira Lizartzako udalak udalerrian etxean sortutako organikoa kudeatzeko auzoko konposta guneak jarri zituenetik. Udaletik esan dute orokorrean "balorazioa oso positiboa" dela, baina, "aldaketa guztietan gertatzen den bezala, badaude gauzak hobetzeko". Izan ere, konpostaje etxolek eta orain arteko antolaketak espero ziren emaitzak ez dituztela lortu adierazi dute.
Hori horrela, herrian dauden konposta gune guztiak berritzea erabaki du udalak, eta horien funtzionamendua ere aldatzea. Azken asteetan, beste bi gune berri jarri dira indarrean: frontoi ondoan bata, eta Urondoa auzoan bestea. Bi gune horietan jarriko den konposta sistemaren nondik norakoak azaltzeko, informazio batzarrak antolatu ditu udalak. Bihar, hilak 23, 17:15ean frontoi ondoko konposta gunean izango da lehena, eta 18:15ean Urondoa auzoko konposta gunean bigarrena. Udalak batzar horietan parte hartzeko deia egin die herritarrei.