Lau eta erdiko txapelketako lehen partida jokatu du Erik Jakak, final-laurdenetako ligaxkakoa. Tolosako Beotibarren neurtu dituzte indarrak Baikoko bi pilotariek eta ikusgarria izan da.
Partidan lehen zati luzean bizkaitarrak eman dio ikusgarritasuna lehiari. Ondoren, lizartzarra izan da pilotalekua sutan jarri duena, 21-5ekoa iraultzetik gertu izan baita.
Jakari jokoan sartzea kosta egin zaio, edo Urrutikoetxeak ez dio utzi. Jaun eta jabe izan da bizkaitarra jokoan eta markagailuan. Partida erraz irabaziko zuela zirudien, baina orduan etorri da Jakaren ikuskizuna. 16 tanto atzetik joan arren, ez du galdutzat eman lehia eta tantoz tanto artekariak ere zutik jarri ditu.
18-21ekoan, ordea, sakez falta egin du eta hortxe joan zaio partida, Urrutikoetxearen zoramenerako.
Datuei begiratuta, 219 pilotakada izan ditu partidak. Urrutikoetxeak hamalau egin ditu eta zazpi galdu. Jakak egindakoak hamaika izan ditu eta galdutakoak zortzi.
Ligaxkako hurrengo partida berriro ere Tolosako Beotibarren jokatuko du Erik Jakak, urriaren 18an, astelehenean. Unai Laso izango da lizartzarraren aurkaria.