Mendiz mendi pasa dute goiza Lizartzan, presoen alde

Gaur goizean egin da Mendiz Mendiz Etxera mendi ibilaldia Lizartzan; denera 232 mendizalek osatu dituzte ibilbideak.

Iaz beste modu batera ospatu bazen ere, gaur betiko moduan ospatu dute Mendiz Mendi Etxera ibilaldia. Lau ibilbide prestatu dituzte, luzera ezberdinetakoak, eta oraintxe ateri oraintxe euri izan badute ere, 232 pertsonek hartu duten parte lau ibilaldietan.

Ateratzen lehenak, ibilbide luzekoak izan dira. 07:00etan abiatu dira Lizartzako plazatik eta 35 kilometro osatu behar izan dituzte. 41 lagunek eman dute izena ibilbide hori osatzeko. Ondoren, 08:00etan, 18 kilometroko ibilbidea egin dutenak atera dira, guztira 67 mendizale. Beranduago, 09:30ean, 10 kilometro egitera abiatu dira beste 59 lagun, eta azkenik, 10:30ean aterata, 3 kilometroko ibilbidea osatu dute 65 pertsonek.

Eguerdi inguruan iritsi dira gehienak bueltan plazara. Eta ordurako, antolatzaileek prest zuten bazkaria. Aurten, egoerak besterik ahalbidetzen ez zuenez, eramateko janaria prestatu dute: paella eta postrea. Batzuk bertan jateko tartea hartu dute, plazako banku nahiz lurrean eserita, eta beste hainbatek etxera eraman dute.

Antolatzaileak gustura agertu dira berriro lehengo moduan ospatu ahal izan dutelako. Hala ere, Nagore Esnaola antolatzaileak esan du beste urteetan baino jende gutxiagok hartu duela parte: "Eguraldiak ere izan du eragina, eta bestetik, pandemia dela eta jendeari oraindik kosta egiten zaio horrelako ekintzetan parte hartzea".

Jende gehiago edo gutxiago izan, helburua bera izan da: oraindik preso jarraitzen duten lizartzarrei, besteak beste, Aitor Agirrebarrena, Gari Etxeberria eta Ion Rubenachi babesa adieraztea.

Albiste hau ATARIKIDEei esker argitaratu dezakegu. Haiei esker Tolosaldeko albisteak libre, euskaraz eta kalitatez irakurtzen dituzu. Horrela izaten jarraitzeko eman babesa Tolosaldeko Atariari eta ZU ERE IZAN ZAITEZ ATARIKIDE.

#EgitenDuzunaGara


EGIN ATARIKIDE!