“Herri batek bere jatorria, historia eta hizkuntza ez baditu ezagutzen, sustrairik gabeko zuhaitza da”. Marcous Garvey kazetariak esandako esaldiarekin eman zion hasiera atzo Euskal Herriaren historia ikastaroaren lehen saioari Fernando Rojo, geografiako eta historiako irakasleak. “Euskaldunon historia zabaltzea” du asmoa, eta horretarako, Euskal Herriko hito garrantzitsuenen inguruan jardungo da ikastaroan zehar. Hala nola, Baskoniako Dukerria, Orreagako gudua eta Foruak, besteak beste.
Lizartzako Kalamatrike taldeak antolatuta, bere bidaietan oinarritutako argazki-erakusketarekin hasi eta Euskal Herriaren historia ikastaroa antolatzen bukatu zuen Rojok. Izan ere, jendeak interesa zuela ikusi ez ezik, euskaldunon artean “gabezia” dagoela ere ohartu zen: “Munduko herrialde guztiek bere historia zaindu egiten dute, baina euskaldunok ez”. Horregatik, “nongo historia” kontatu baino gehiago, “noren historia” azaltzeari ekin zion atzo Rojok.
Bigarren saioa apirilaren 24ean izango da Lizartzako Kultur Gunean 11:00etatik 13:00etara. Ikastaroari jarraipena emanez, XIV. mendetik gaur arteko gertakariak azaltzeko asmoa izango du; hain zuzen, Nafarroako konkistarekin hasiz eta frankismoarekin bukatuz. Bertan, hainbat mugarri ere azalduko ditu. Hala nola, 36ko gerra eta Ipar Euskal Herriko Frantziako Iraultza, besteak beste.