Partidaren ostetik, eta goizean goizetik zorion mezuak etengabe jaso ditu Erik Jaka txapeldunak. Bada, herriak ere zoriondu nahi izan du lizartzarra buruz buruko txapela herrira eramateagatik, eta duela minutu gutxi Otsabio kirol elkarteak antolatuta, ekitaldi polita eskaini diote, herriko hainbat talderen parte hartzearekin.
Omenaldi xumea, eta hunkigarria izan da. Isk&bila txarangak eta Garazi Esnaolaren piano doinuek girotu eta Otsolar dantza taldeko dantzariek apaindu dute ekitaldia. Protagonistari pilota eskolako haurrek egin diote pasilloa, eta koadro bat ere eman diote opari moduan. Herriak Jakarekin harro dagoela erakutsi du, eta Jakak, ildo beretik erantzun: «Harro nago lizartzarra izateaz».