Lizartzako Udalak Erik Jaka zoriondu du atzo buruz buruko finala irabazteagatik- Horrekin batera, herritarrak gonbidatu ditu, gaur Otsabio Kirol Elkarteak antolatuta, herritarrek egingo dioten omenaldira. Herriko plazan hasiko da ekitaldia, 19:30ean, eta 300 pertsonarentzat mugatu dute lekua.
Era berean, egungo egoera dela eta, jende pilaketak ekidin nahi ditu Lizartzako Udalak, eta horregatik, herri mugakideetako biztanleei "arduraz jokatu eta omenaldira ez gerturatzeko eskaera" egin die. Lizartzako Udaletik esan dute espero dutela "aurrerago elkarrekin ospatu ahal izatea". Halaber, omenaldian izango diren herritarrei, "azken hilabeteetan erakutsitako ardura berberaz jokatzea" eskatu die, "indarrean dauden arauak errespetatuz".