Seigarren edizioa berezia izan da Mendi Mendi Etxera mendi ibilaldian parte hartu dutenentzat. Aurten, pandemia egoeragatik, ezin izan dute urtero prestatu ohi duten ibilbidea jarraitu, baina, ez dira besoak gurutzatuta geratu eta beste modu batera antolatu dute. Bakoitzak gogoko duen mendi, gailur, txokoren batera egin dute ibilaldia eta handik argazkiak bidali dizkiete antolatzaileei izen emate garaian jasotako zapiak soinean zituztela. Horrela, mendi tontor ezberdinetatik aldarrikatu dute ozen: dispertsioarekin amaitu eta presoak etxeratzea.
Antolatzaileek azaldu dutenez, Euskal Herriko txoko ezberdinetatik jaso dituzte argazkiak, eta elkartasuna ere iritsi zaiela azaldu dute, "sekulako indarra eman digute". Guztira 300 parte hartzailek eman dute izena aurtengoan, eta herritarren erantzuna "sekulakoa" izan dela diote. "Badira mendira joan ezin izan zuten batzuk ere, eta ohiturari eutsi nahian, paella ederra prestatu zuten". Txoko ezberdinetako tontorrak zapaldu dituzte parte hartzaileek: "Hirumugarrieta, Balerdi, Otsabio, Urkita, Onddi, Ulizar, Anboto, Hernio, Txindoki, Larte, Urbia, Axurdario, Goltzur zelai, Uzturre, Artubi, Basagain, Belkoain eta beste hainbeste".
Jaso dituzten argazki guztiekin bideo bat prestatu nahi dute antolatzaileek. Eta argazkiak bidali dituzten guztien artean zozketak ere egingo dituzte. Mahala produktuak, Larretako produktuak, Lezaetako ogia, Antsonea gaztak, herriko sagar zukuak, Orexako Ostatuak eskainitako hiru otordu bikoitz, Lizartzako Ostatuak eskainitako otordu bikoitza, Zuhaizkik emandako egurrezko jolas batzuk eta presoek egindako hainbat eskulan zozketatuko ditutze.