Ikasturte hasiera guztiak festan hasten dituzte lizartzarrek. Aurten, ordea, herriko festarik ez dute izango. Ordainetan, iraileko asteburuetarako kirol eta kultur eskaintza prestatzea erabaki du Lizartzako Udalak. Astebururo izango da zerbait. Bertsoekin hasi, eta antzerkiarekin amaituko dute egitaraua.
Irailaren 5ean, larunbatean, bertso saioaz gozatzeko aukera izango da. Amets Arzallus, Oihana Iguaran, Maialen Lujanbio eta Julio Soto igoko dira oholtza gainera, 19:00etan. Gai jartzaile lanak Amaia Agirrek egingo ditu, eta Zimiterioan egingo da saioa.
Irailaren 12an, musika izango da protagonista. Olatz Salvador bakarlariak kontzertua eskainiko du, 19:00etan hasita, Medikuaren etxe aurrean.
Astebete beranduago, irailaren 19an, Bike Show Trial bizikleta izango da plazan. 17:00etan, haurren txanda izango da eta beraiei zuzendutako trial saioan parte hartzeko aukera izango dute. 19:00etan, aldiz, Irene Caminos eta Javi Alonso igoko dira bizikleta gainera, eta ikuskizuna eskainiko dute.
Kultur eta kirol eskaintzarekin amaitzeko, irailaren 26an, antzerkia izango da. Haurrei zuzendutako Bano Royal antzezlana eskainiko dute Ganso & Cia-k. Plazan izango da, 19:00etan.