Pituxa eta Otxoku pailazoak, Garazi Esnaola akordeoi jolearekin batera, traktore baten atoian joan dira eguerdian herriko kaleetatik. "Egitasmoaren helburua izan da, konfinamendua arintzen hasi den honetan, herritarrei zabaltzea oso ondo egiten ari garela, eta orain kalera ateratzen hasiko garela-eta ze neurri mantendu behar diren", azaldu du Itziar Saenz de Ojer zinegotziak. "Alegia, eskuak maiz garbitzearena, bi metroko distantzia mantentzearena,... Iruditzen zitzaigun garrantzitsua herritarrei hori helaraztea, oraindik ez gaudelako egoera normal batean. Egitasmoan parte hartu dutenek ere uneoro distantziak mantendu dituzte euren artean".
Herri txikietan jende pilaketak saihestea errazago bada ere, "kontuan hartu behar dugu ez gaudela egoera normal batean", zehaztu du Saenz de Ojerrek. "Horregatik bururatu zitzaigun modu honetara zabaltzea neurrien berri. Jendea balkoietara azaltzen zen, eta azaldu zaie hartu behar diren neurriak. Hau guztia, umoretik eta Garazi Esnaolaren musikarekin". Erdigune guztia pasa dute eta gustura aritu dira egitasmoaren parte hartzaileak eta baita balkoietara azaldu diren herritarrak ere. Neurriei buruzko mezuak zabaltzeaz gain, dantzak ere egin dituzte, eta bonboiak banatu erraketen bitartez.