Nagore Esnaola antolakuntzako kideak azaldu duenez, "guretzat sekulakoa da hainbeste mendizale bertan izatea. Egunean bertan jende ugarik eman du izena, eta eguraldiak ere lagundu du horretan". Aurten berritasuna 10 kilometroko ibilaldia izan da, gaztetxoei begira antolatua, eta bertan 71 mendizalek parte hartu dute. 35 kilometrokoan 89 mendizale izan dira, 18 kilometrokoan 137, eta 3 kilometrokoan 149 mendizale.
Aitor Agirrebarrena eta Gari Etxeberria preso lizartzarrei eta euren senideei elkartasuna adierazteko, eta dispertsioak sortzen dituen gastuei aurre egiten laguntzeko antolatu dute mendi ibilaldia. Aurtengoa laugarrena da, eta Esnaolak Lizartzako herritarrek erakusten duten inplikazioa nabarmendu du: "Jende asko behar da hau dena antolatzeko, eta dena auzolanean egiten da. Herritarrek bere egutegian markatzen dute egun hau eta eskertzekoa da jasotako laguntza guztia".