Lizartzako Hostotsa abesbatzaren kontzertua, larunbatean

Hostotsa abesbatzak Jesus Mari Esnaola Xoane zuzendariak sortutako Zure itsasoa ikusiko balitz eta Zuregana noa abestiak eskainiko ditu, Xoanek moldatutako Benito Lertxundin Itzaltzuko bardoa, eta herrikoiak diren Sagarra jo! (Kalakan) eta Maitia nun zira (J. Uruñuela). Pianoan Garazi Esnaola ariko da, bibolinan Ismene Urkiza, gitarran Txema Murgialdai, txalapartan Iñaki A. eta Txema Murgialdai, eta perkusioan Manex eta Beñat Bengoetxea.

Ereñozuko Ozenki abesbatzak ere, Imanol Kamio Etxeberriaren zuzendaritzapean, Xoaneren bi abesti eskainiko dituzte; Gure aita eta Herriminez, eta horiez gain, Leonard Cohenen Hallelujah eta Norman Tailorren Gospel Train eskainiko dituzte, besteak beste.

Bi abesbatzak batera ere ariko dira. Sarriegi eta Mokoroaren Ilunabarra; Lesbordesen Kantuz; Artze, Laboa eta Bustoren Txoriak Txori eta Sorozabalen Kalez Kale abestuko dituzte. Iñaki Azpiroz, Mateo Zubeldia, Ekaitz Hurtado eta Manex Bengoetxea ariko dira txistuarekin.

Lizartzako Hostotsa abesbatza 2015eko udazkenean sortu zen. Partaide gehienak herriko Isk&bila txarangako kideak dira eta gaur egun, 15 ahots eta hainbat musikarik osatzen dute taldea. Jesus Mari Esnaola Xoanek zuzentzen du korua.