Jean McConvillek 37 urte zituen bahitu zutenean. Alarguna zen, eta hamar seme-alabaren ama; 1972an bahitu, hil, eta ezkutuan ehortzi zuen IRAk, Erresuma Batuko segurtasun indarren "salataria" izatea egotzita. Gerora, susmo horiek okerrak zirela ondorioztatu zuten PSNIren Herri Defendatzailearen Bulegoaren ikerketa baten bidez.
IRAk 1999an aitortu zuen, Ostiral Santuko Akordioak sinatu eta urtebetera, McConville —ezkontzean katoliko bihurtutako protestantea— eta beste zortzi errepublikano hil eta desagerrarazi zituela; McConvilleren gorpua 2003an aurkitu zuen ibiltari batek, Louth konderriko hondartza batean lurperatuta. Hainbat ikerketa lanek diote hamazazpi izan zirela talde armatu errepublikanoek desagerraraziak.
AEBetako Bonton College unibertsitateak 2001 eta 2006 artean IRAko hainbat militante ohiri egindako elkarrizketetan oinarrituta, Gerry Adams atxilotu zuten iragan maiatzean. Grabazioak elkarrizketatuak hil arte ez zirela argitara aterako hitzemanda, IRAko zenbait disidente —Brendan Hughes komandante ohia, Dolours Price eta Ivor Bell bera, besteak beste— eta paramilitar ohiak ere elkarrizketatu zituzten, Irlandako gatazkari buruzko ikerketa lan baterako.
Baina PSNIren eskaria onartu, eta AEBetako auzitegi batek giltzapean gordetako grabazioetako batzuk Ipar Irlandako Poliziaren esku jartzeko agindu zuen.