Urtean, gutxienez, bi aldiz elkartzeko ohitura izaten dute Leaburu-Txaramako eta Larresoroko herritarrek. Pandemiaren eraginez, ordea, bi urte igaro dira ez dutela elkar ikusi. Urteroko hitzordua berreskuratuz, gaur berriro elkartu dira bi herritako lagunak, eta hamaikak inguruan Leaburuko plazara iritsi dira.
Lehendabizi, herriko gaztetxoenek dantza egin diete harrera gisa. Jarraian, hamaiketakoa egin dute herriko sagardogileen sagardoarekin, eta ondoren, bertso pilota izan dute Sebastian Lizaso eta Mikel Mateo bertsolarien eskutik. Pilota partidetan, berriz, Arkaitz Esnaola Jon Erasunen aurka aritu da. Senidetze festa amaitzeko, denek elkarrekin bertso bazkaria egin dute herriko ostatuan.