IX. Artisau eta Barazki Azoka egingo dute igandean, hilak 29, Leaburu-Txaraman. 10:00etan irekiko dituzte postuak eta hainbat zozketa ere egingo dituzte. Era berean, zaldian ibiltzeko aukera egongo da eta baita gari irinez egindako talo bereziak jateko parada ere. Kuba, Maroko, Argentina, Peru eta Errumaniako jakiek ere izango dute euren lekua 11:00etatik aurrera, izan ere, aurten kultur aniztasunari tartea egin nahi izan diote.
12:00etan motozerraz egurra lantzeko erakustaldia eskainiko du Berastegiko Luis Erasok. 13:00etan zaldi erakustaldia eskainiko du Joxe Manuel Iriartek eta ondoren bertso bazkaria egingo dute Zazpi Bide elkartean Jokin Uranga eta Beñat Gaztelumendi bertsolariekin. Txartelak udaletxean eta ostatuan erosi daitezke. Helduek 20 euro ordaindu behar dituzte eta haurrek 10 euro.