Atzo, Leaburu-Txaramako VI. artisau, barazki eta ganadu azoka ospatu zen. Postuak goizean goizetik prest zeuden, eta baziren lehen orduan mugitu ziren bezeroak ere. Baziren azoka irekitzerako Leaburuko frontoira gerturatu zirenak, euren gustuko produktuaren bila. Hala ere, jende gehien eguerdi aldean bildu zen frontoira. Bertan zeuden produktuak ikusi eta zenbait kasutan bertan zegoena erosi ostean, gehienek taloak egiten ari ziren herritarren postuan egin zuten geldiunea. Taloek izugarrizko arrakasta izan zuten eta zenbait osagarririk gabe ere geratu ziren. Hain preziatuak diren onddo mordoxka ere ikusi ahal izan zen, eta azokako produktuekin osatutako bi saskietan ere saskika onddo banatu zituzten.
Azokaren ondoren, 70 pertsona inguru bildu ziren elkartean bazkaltzen. Herritarrez gain, Larresoroko lagunak ere izan ziren bazkaltzen. Giro bikaina izan zen eta horretan lagundu zuten bazkal ondoren bertsotan aritu ziren Sustrai Colinak eta Jokin Urangak ere. Arratsaldea luze joan zen azkenean, egun borobila osatuz.