Larraulgo leize batean garbiketa lanak egiten ari zirela obus bat topatu dute. Lan bertikalak egiten dituen enpresa bateko langileek topatu dute. Hain zuzen, Lurpea Garbi elkartekoek garbitu beharreko leizeak identifikatu zituzten, eta horri jarraituta eskatu zuen Larraulgo Udalak herriko leize horretan pilatutako hondakinak ateratzea. Horrela topatu dute obusa. «Bigarren astea da jada hemen garbiketa lanak egiten ari garela. Bagenekin inguruko baserritarrek eta Aranzadikoek esanda zerbait egon zitekeela. Joan den astean azaleko hondakinak ateratzen aritu ginen, bolumen handieneko hondakinak, eta aste honetan beste fase batean hasi gara; leizean behera egin dugu eta zuloetan barneratu gara, hor azaldu da obusa. Protokoloa jarri dugu martxan eta Ertzaintza etorri da. Ondorioz, lanak gelditu egin ditugu», esan du hondakinak ateratzen aritu den enpresako Patxi Navasek.
Jose Luis Beobide leizea dagoen lursaileko jabea da eta harrituta dago aurkikuntzarekin; ez ordea, Koldo Jauregi larrauldarra: «Herrian horri buruz zeozer hitz egin izan da, duela 50 urte edo. Niri adineko pertsona batek esan zidan aspaldi, gerra bukatuta, leizera gauzak bota zituztela. Herritarrek bazuten susmoa, gorago lubakiak zeuden eta jende askok esaten zuen pistolak eta bota zituztela. Baina orain arte ez da ezer atera».