Tradizioarekin jarraituz, suziria jaurtitzearekin batera, Pello Joxepe elizatik behera jaitsiz abiatu dira Larraulgo festak. Lourdes San Sebastian eta Maria Jesus Treku herriko baserritarrek izan dute aurtengo txupinazoa botatzeko ardura. Bertan, herriko emakume baserritarrok egiten duten lana balorean jarri dute. «Emakume baserritarrok eguzkitik eguzkira lan egin izan dugu, baserrian, familia zaintzen, eta baita handik kanpora ere. Gaur, ordea, plazan gaude, herriaren bihotzean, guztion bistan».
Halaber, festa alaiak, berdinzaleak eta errespetuan oinarritutakoak nahi dituztela aldarrikatu dute: «Larrauldarrok, gure herria aspalditik dator eta, urrunera egin dezagun etorkizuneko bidea elkarrekin».
Behin suziria lehertuta, festa nagusitu da Larraulgo plazan. Umeentzako goxokiak bota dituzte udaletxeko balkoitik, eta batzuk ezustean harrapatu dituzte udaletxeko atetik korrika irten diren buruhaundi txikiak. Horren ostean, Lasko txaranga arduratu da txupinazo osteko festari jarraipena emateaz, eta gauean, herriko gazteek kanpaldia egingo dute.
Aurrerantzean ere ekintzaz beteko da Larraul. Egitarau guztia hemen ikusgai.