Bertsozale Elkarteak Bertso Udalekuak antolatu ditu bertsozale gazteenentzat. Izen ematea zabalduta egun gutxitan bete ziren leku guztiak, eta guztira, 163 gaztetxok eta 31 hezitzailek hartuko dute parte. Adinka banatu dituzte txandak eta 14 eta 15 urte arteko gazteak, adibidez, Larraulgo aterpetxean elkartuko dira uztailaren 25etik 31ra.
Euskal Herriko herrialde guztietako eta Diasporako gaztetxoek hartuko dute parte Bertso Udalekuetan eta egonaldiak Amaiurren, Irañetan, Zuhatzan eta Larraulen egingo dituzte. Udalekuetako parte hartzaileen %80a bertso eskola bateko kideak dira, eta Bertsozale Elkartetik argitu dutenez, behin Zuhatzan Bertso Udalekuak lehen aldiz probatuta, %75ak errepikatzen du ondorengo txandetan.
Bertsozale Elkarteak antolatzen ditu Bertso Udalekuak, Eusko Jaurlaritzako Euskara Sailaren eta Bizkaiko Foru Aldundiaren babesarekin eta Irizarren laguntzarekin.
Honela banatu dituzte txandak aurten:
- Uztailaren 8tik 17ra Amaiurren, 16-18 urte bitartekoak.
- Uztailaren 18tik 24ra Irañetan, 12-13 urte bitartekoak.
- Uztailaren 24tik 28ra Zuhatzan, 9-11 urte bitartekoak.
- Uztailaren 25etik 31ra Larraulen, 14-15 urte bitartekoak.