Ostiralean bertso afariko Mingañe Saltsan sariketako finala jokatu zen Leitzako Torrean. Mikel Azpiroz aritu zen gai jartzaile eta 60 lagun inguru bildu ziren bertara. Ia bi ordu eta erdiko saioaren ondoren, epaileek Jexux Mari Irazu izendatu zuten txapeldun. Sari gisa Leitzako festetako blusa eta festetako bertso saioan parte hartzeko gonbidapena eskatu ditu larrauldarrak.
Lehenengoz antolatu du Leitzako Atekaberts bertso eskolak Mingañe Saltsan sariketa. Afari bueltako hiru saio eta finala izan ditu sariketak. Finalean kantatu duten sei bertsolariez gain, ondorengo beste bertsolari hauek hartu dute parte Uitzin, Berastegin eta Aranon jokatutako finalerdietan: Paule Loizaga, Xabier Legarreta Arano, Ander Fuentes Itturri, Maddi Ane Txoperena, Asier Azpiroz, Sarai Robles, Ane Zuazubiskar, Joanes Illarregi, Ekhiñe Zapiain eta Eneritz Artetxe, eta eskualdeko bi ordezkari, Iñigo Gorostarzu Etxorde berastegiarra eta Beñat Iguaran amasarra.