San Esteban eguna izaki, herriko jaietako egun handia beharko luke gaurkoak Larraulen, baina, aurtengoan ere ezin izan dute ohiko moduan ospatu. Festarik ezean, baina, hainbat ekitaldi izan dituzte azken egunotan, eta gaurkoan ere goizean nahiz arratsaldean larrauldarrek izan dute gozatzeko aukera.
Eguerdian, esaterako, jokoak prestatu dituzte herriko plazan gaztetxo, gazte nahiz helduentzat. Hala, gazteak tokan, lokotx biltzen, boloetan nahiz aulki jokoan animatu dira, eta helduek, berriz, tokan egin dute.
Atzo iluntzean Mikra akrobazia antzezlana izan zen ikusgai, eta udaletik esan dutenez ikuskizunak harrera ona izan zuen, eta bertaratu zirenek ederki igaro zuten.
Festen ordez antolatu dituzten ekitaldietan azkena gaurko Arineketan ikuskizuna izango da, Iñar Sastre eta Jagoba Astiazaranen eskutik.