Larraulgo Udalak Kirol Astea antolatu zuen maiatzak 19tik hasita gaur arte, eta Larraulgo Gizarte Abentura taldeko gazteak ere antolakuntzaren parte izan dira. Izan ere, Kirol Asteari amaiera eman diote gaur herriko haur, gazte eta helduentzat antolatu duten krosarekin.
Adina kontuan izan da, parte hartzaileak hiru taldetan banatu dira eta herriaren barrena egin dute lasterketa. Lehen txanda 3 eta 5 urte bitarteko haurrena izan da. Ibilbide motzena izan badute ere, Larraulgo txikienek guztira hiru itzuli egin behar izan dituzte. Bigarren taldea 6 eta 12 urte bitarteko gazteek osatu dute. Haurrek baino ibilbide luzeagoa zuten eta bi itzulitan egin dute. Helduen txanda izan da azkena. Gazteen ibilbide bera, baina itzuli bakarra eman behar izan diote herriari.
"Pentsatzen genuena baino jende gehiago etorri da", guztira 18 herritarrek parte hartu dutela adierazi baitute Larraulgo Gizarte Abenturako kideak. Hortaz, oso balorazio positiboa egin dute: "Goiza oso ondo joan da, ez baitugu kontrola galdu eta korrika egin dutenak ere emaitzarekin oso gustura geratu dira". Hori dela eta, hurrengo urtean ere krosa antolatuko dutela aurreikusten dute.
Bitarte horretan, urtean zehar lanean jarraituko dutela jakinarazi dute. Izan ere, hainbat ekintza antolatuko dituzte, eta datorrena jada badu lekua eta hitzordua zehaztuta. Hain zuzen, ekainaren 13an mendi ibilbidea egingo dute Erniora, eta bertan parte hartzeko deia egin dute.