Larraulgo herri kirol jaialdian ere beste bi saio izango dira. Batetik, Hiru Hamarreko Harri-jasotze Txapelketan, Xabi Peñak eta Jokin Eizmendik parte hartuko dute. Azken honek Telleriaren lekua hartu du, mina hartuta baitago.
Bestetik, Emakumezkoen Harri-jasotzeko Txapelketaren beste saio bat izango da. Karmele Gisasola Zelai III.a-k parte hartuko du bertan.
LEHEN SAIOKO EMAITZAK
Aurreko larunbatean izan ziren hiru txapelketa horien lehen saioak, Apatta Industriagunean. Urrezko Banakako Aizkolari Txapelketan Jon Rekondo leitzarrak erraz irabazi zion Arraiarango Iñaki Azurmendiri, eta orain Iker Vicenteren aurka lehiatuko da finalaurrekoan.
Hiru Hamarreko Harri-jasotze Txapelketako aurreneko neurketan Urdax Magunazelaia eta Mikel Lopetegi Urra lehiatu ziren elkarren aurka. Ia erabateko berdintasuna eman zen norgehiagokan, izan ere, 44na altxaldi egin zituzten 125 kiloko harriekin. Emakumezkoen Harri-jasotze Txapelketan, Udane Ostolaza gazte oriotarrak 50 kiloko zilindrikoari 15 altxaldi eman zizkion, 50 kiloko kubikoari bederatzi, eta pisu bereko bolari, 12.