COVID-19ak eragindako osasun alerta dela eta, Larraulgo Udalak segurtasun printzipioak behartuta, San Joan, San Esteban eta San Bartolome jaiak bertan behera uztea erabaki du. "Erabaki hori ez genuen hartu nahi, baina ez dira betetzen osasunerako beharrezkoak diren baldintzak", esan dute.
Abuztuan egoera hobeagoan egotea espero dute Larraulgo udal ordezkariek, "koronabirusa bertan egongo da, eta jaietako jarduerekin sortuko liratekeen jende pilaketek kutsatzeko arriskua ekar dezakete". Bandoan jakinarazi dutenez, ahal ere, ez dute baztertzen San Esteban egunean jardueraren bat egitea, "beti ere segurtasun neurri guztiak bermatu badaitezke".
"Pena handia hartzen dugu aurten Larraulen jairik ez izatean", adierazi dute udal arduradunek. Dena dela, herriko jaien garrantziaz jabetuta, urtero ospatzen den kultur astean jarduera gehiago antolatzea ez du baztertzen udalak, beti ere, momentu horretan biziko den osasun egoerak horretarako aukera ematen badu.