Larrauldarrei amaitzen ari zaizkie festak, eta sanestebanen azken hitzorduei zuku guztia ateratzen dihardute. Eguerdian, sagardo dastatzearen ondoren, herriko gazteek antzerki obratxoa eskaini dute plazako oholtzatik, herritarrak komunitatean bizitzera deituz.
Pentsatu, idatzi, eraiki, entseatu eta antzeztu; guztia egin dute Larraulgo gazteek. Detektibe bat protagonistatzat hartu, eta herrian amorrua, gorrotoa eta haserrea zabalduegi zeudela-eta, ikerketari ekin dio detektibeak, sentimendu horien zergatia argitu nahian.
Bide horretan, pertsonaiak eta dekoratuak aldatu dituzte gazteek, eta azkenean iritsi dira lortu nahi zuten ondoriora: irria berreskuratzeko, indibidualismotik irten eta komunitatea sortu behar da.
Antzezlana biribiltzeko, herritarrak irudikatuz, hainbat larrauldarren azalean sartu dira herriko gazteak, ikusleen barrea eraginez; jaietan ohikoa den argazkilaria ere pertsonaietako bat izan da, taldeko argazkia izoztuz.
Eguerdiko paella jatearen ondoren, 18:00etan bertso saioa izango dute, eta Izer eta Alabier trikitilariek biribilduko dituzte sanestebanak, abuztuaren 24ko festa egunerako harra utziz.