Iragan abenduaren 9an, Amezketako errota eraberrituan, hau da, Pello Zabala gunean, Agurtzane Garmendiak talo tailerra eskaini zien LH 3-6 maila bitarteko ikasleei. Tailer bera errepikatu zuten txikiagoekin abenduaren 15ean, orduan HH eta LH 1-2 mailetako ikasleei egokitu zitzaien aukera. "Euskal kulturaren transmisioa zabaldu eta ohiturak haurren artean mantentzeko asmoz" antolatu zuten irteera Zumadi eskolatik. Izan ere, taloak egiteaz gainera, Garmendiaren ahotik azalpenak ere jaso zituzten. Esaterako, ikasleek adi-adi jarraitu zituzten Amezketako garai bateko errota kopuruaren nondik norakoak, arto klase ezberdinen ezaugarriak edota artoaren prozesua bera.
Ikasleek garai bateko ohituren inguruko informazioa jasotzen zuten bitartean, eskuak ere masan sartu eta taloak egin eta bertan jateko aukera izan zuten, txokolate eta txistorra aukeran zutela.
Bisita positiboki baloratu dute Zumaditik: "Iaz LH 6. mailan zeuden ikasleen bisita ere jaso genuen eta denok elkarrekin egon ginen kontu kontari".
Gabonekin lotura
Lehen hiruhilekoari amaiera emateko Gabonen bezperan egin dute bigarren bisitaldia Pello Zabala gunera. Pasa den abenduaren 21ean, Olentzerori gutuna botatzera joan ziren Zumadiko ikasleak. Oraingoan ere, Agurtzane Garmendia izan zuten bidelagun. Garmendiak berak laguntzaileak ere izan ditu: astoa, laguntzaile bat eta akordeoia eta panderoa.
Ikasle eta irakasleak kalejiran joan ziren errotaraino eta eguna entsegurako ere aprobetxatu zuten. Izan ere, abenduaren 24 goizean kantari aterako direla-eta kantuen entsegua egiteko baliatu zuten Errotako bisitaldia.