Irati Egibarrek garatu du "Zizurkilgo kirolariak historian zehar" lana, Udalaren bekaren bidez

Erabiltzailearen aurpegia

Irati Egibar Izeta gazte zizurkildarrak garatu du Zizurkilgo kirolarien inguruko ikerketa lana. Udalak emandako bekari esker egin ahal izan du azterketa hori eta dagoeneko amaitu du bere lana. Hainbat testigantza jaso du Iratik bere lana garatzeko.

Gustura aritu da Irati Egibar Zizurkilgo kirolarien berri jasotzen: "Oso prozesu aberasgarria izan da. Edozein kirolari elkarrizketatzean, beste bi edo hiruren izenak ateratzen ziren. Kate modukoa osatu dugu guztion artean. Ikaragarrizko prestutasuna erakutsi dute nire galderak erantzuteko eta hori bereziki eskertu nahi nuke. Herriarentzat egindako lana izan da eta jendeak oso jarrera ona erakutsi du".

Hasieratik garbi izan zuen Iratik jendearen partaidetzarekin osatu nahi zuela lan hau: Horretarako, blog bat ireki nuen. "Nire aurkikuntzen berri ematen nuen bertan eta edonork gainera zezakeen informazio berria".

Genero ikuspegia; kirola, jolasa eta jokoaren arteko aldea..., arlo ezberdinak hartu ditu kontuan Iratik bere lana garatzeko garaian eta ezusteko polit bat baino gehiago izan du. "Teodoro Mujika herritarrak esandakoak ez nituen ezagutzen, esaterako. Herrian bolatokiak zeudela, edo borroka greko-romanoa ere egin izan zela... Nola pentsatuko nuen nik horrelakorik? Pilota, herri-kirolak... horrelakoak espero nituen, baina ezusteko polita izan da gure herrian  kirol arloa ere hain anitza dela ikustea".

Albiste hau ATARIKIDEei esker argitaratu dezakegu. Haiei esker Tolosaldeko albisteak libre, euskaraz eta kalitatez irakurtzen dituzu. Horrela izaten jarraitzeko eman babesa Tolosaldeko Atariari eta ZU ERE IZAN ZAITEZ ATARIKIDE.

#EgitenDuzunaGara


EGIN ATARIKIDE!