Guztira 4,27 hektareako azalera batean 7.000 zuhaitz inguru landatu dira, eremua naturalizatu eta bertako espeziekin osatutako baso iraunkor bat birsortzeko helburuarekin.
Horrela, Villabonako onura publikoko mendian Gipuzkoako Foru Aldundiko Mendiak eta Habitatak Kudeatzeko Zerbitzuak 5.500 haritz (Quercus robur) eta 500 urki (Betula alba) landatu ditu. Horiez gain, basoaren aniztasuna eta egitura ekologikoa aberasteko, beste 1.000 ale inguru ere sartu dira espezie laguntzaileen artean: tiloak (Tilia), gereziondoak (Prunus), sorbus generoko zuhaitzak, udareondoak (Pyrus) eta sagarrondoak (Malus), besteak beste.
Bestalde, aurreko pinudiaren matarrasa egindako eremuko gainerako zatietan ez da landaketarik egin. Izan ere, azpibasoa modu naturalean garatzen hasita zegoela ikusita, eremu horiek bere kasa lehengoratzeko gaitasuna zutela baloratu dute teknikariek.
Egitasmo honekin, bertako baso-espezieen hedapena bultzatzeaz gain, biodibertsitatea indartu nahi da, klima-aldaketari aurre egiteko gero eta garrantzitsuagoak diren helburuak betez.