Protokolo honen bidez adostutakoaren arabera, Uraren Euskal Agentziak herriko ibai eta erreken ingurunea hobetzeko eta mantentzeko lanak egingo ditu, eta bere gain hartuko ditu ibaien gaitasun hidraulikoaren ahalmena handitzeko lanak ere. Udalak, bestetik, ibaietatik hiri-hondakinak kentzeko, edota sustatu nahi diren ingurumen hobekuntzarako ekimenak egiteko udal-zerbitzuak jarriko ditu eskura. Amasa-Villabonara egindako azken bisitan, Uraren Euskal Agentziako arduradunek, eurite handiak izaten direnean Oria ibaiak Villabonako kale Berrian berriro ere gainezka egitea ekiditeko neurriak aztertzeko konpromisoa hartu zuten. Udal arduradunek neurri eraginkorrak hartzea espero dute, eremu horretan dagoen uholde arriskua nabarmen murriztuko dutenak.
Protokolo honetan jasotzen den beste konpromisoa, Uraren Euskal Agentziak eta Udalak udalerrira egokitutako Ekintza Plan bat adostea da. Ekintza Plan horretan, bi erakundeek Amasa-Villabonan dauden jabari publiko hidraulikoko ibai-ibilgu eta ertzetan egin beharreko lanak zehaztuko dira. Lan horiek, besteak beste, ibai eta erreka ertzetako landaredian kalteak ekiditeko eta, orokorrean, ibai-ekosistema eta bere biodibertsitatea babesteko helburua izango dute.
Protokolo honen jarraipena egiteko batzorde bat eratu da, eta bi erakundeek izango dute ordezkaritza bertan.
Sinatu berri den lankidetza protokolo honek lau urteko iraupena izango du, eta beste lau urtez luzatzeko aukera eskaintzen du, bi aldeek horrela adostuz gero.
Irakurri Uraren Euskal Agentziarekin sinatutako lankidetza-protokoloa